__Syiiran "Eling-Eling Siro Manungso" KH Ali Maksum__

Syiiran "Eling-Eling Siro Manungso" KH Ali Maksum

لاَ إِلَـهَ إِلاَّ  اللَّهْ   #  اَلْمَلِكُ الْحَـقُّ الْمُـبِيْنْ

مُحَمَّدٌ رَسُوْلُ اللَّهْ #          صَادِقُ الْوَعْدِاْلأمِيْنْ

Eling-Eling Siro Manungso

Temenono anggonmu ngaji

Mumpung durung ketekanan

Malaikat juru pati

Awak-awak wangsulono

Pitakonku marang siro

Soko ngendi siro iku

Menyang ngendi tujuanmu

Kulo gesang tanpo nyono

Kulo mboten nggadah sejo

Mung kersane Kang Kuwoso

Gesang kulo mung sak dermo

Gesang kulo sak meniko

Inggih wonten ngalam dunyo

Dunyo ngalam keramean

Isine mung apus-apusan

Yen sampun dumugi mongso

Nuli sowan Kang Kuwoso

Siang dalu sinten nyono

Tekane sing njabut nyowo

Urip nang ndunyo ‘ra suwe

Bakal ngalih panggonane

Akhirat nggon sejatine

Mung amal becik sangune

Sowanmu nang Pangeranmu

Sopo kang dadi kancamu

Opo kang dadi gawanmu

Kang nyelametke awakmu

Kulo sowan nang Pangeran

Kulo miji tanpo rencang

Tanpo sanak tanpo kadang

Bondho kulo ketilaran

Yen manungso sampun pejah

Uwal saking griyo sawah

Najan nangis anak simah

Nanging kempal boten betah

Senajan berbondho-bondho

Morine mung sarung ombo

Anak bojo moro tuwo

Yen wis nguruk banjur lungo

Yen urip tan kebeneran

Bondho kang sa’ pirang-pirang

Ditinggal dienggo rebutan

Anak podho keleleran

Yen sowan kang Moho Agung

Ojo susah ojo bingung

Janji ridhone Pangeran

Udinen nganggo amalan

Amal sholeh ‘ra mung siji

Dasare waton ngabekti

Nderek marang Kanjing Nabi

Muhammad Rosul ilahi

Mbangun turut ing wong tuwo

Serto becik ing tetonggo

Welaso sak podho-podho

Ojo podho saling ngino

Yen ngendiko sing ati-ati

Ojo waton angger muni

Roqib ‘Atid kang nulisi

Gusti Alloh kang ngadili

Ojo dumeh sugih bondho

Yen Pangeran paring loro

Bondho akeh tanpo guno

Doktere mung ngreko doyo

Mulo mumpung siro sugih

Infak ojo wegah-wegih

Darmo jo ndadak ditagih

Tetulung jo pilih-pilih

Mulo mumpung siro waras

Ngibadaho kanti ikhlas

Yen leloro lagi teko

Sanakmu mung biso ndungo

Mumpung siro isih gagah

Mempengo nyengkut jo wegah

Mengko siro yen wis pikun

Ojo nelongso karo getun

Mulo konco podho elingo

Uripmu sing ngati-ati

Mung sepisan ono ndunyo

Yen wis mati ora bali

Gusti Alloh wus nyawisi

Islam agomo sejati

Tatanan kang anyukupi

Lahir bathin kang mumpuni

Gusti Alloh Pangeran kito

Al-Qur’an pedoman kito

Nabi Muhammad panutan kito

Umat Islam sedulur kito

Ya Alloh kang Moho Suci

Kulo nyuwun ilmu sejati

Kangge nglakoni agami

Nyontoh dateng kanjeng Nabi

Mugi Alloh paring ridho

Gesang kito wonten dunyo

Selamet saking beboyo

Teng akhirat mlebet swargo

Amin, amin, amin, amin

Ya Alloh Robbal ‘Alamin

Mugi Paduko ngabulno

Sedoyo panyuwun kulo